2024 жылдың 13-15 қараша аралығында Астана қаласында шығармашыл оқушылар арасындағы республикалық "Ақберен" өнер байқауының республикалық кезеңі өткізілді. Бұл байқау еліміздің жас өрендеріне шығармашылық қабілеттерін көрсету және дамытудың маңызды алаңы болып табылады. Байқаудың мақсаты – 8-11 сынып оқушыларының гуманитарлық-эстетикалық саласындағы дарындарын танытып, олардың шығармашылық әлеуетін ашуға мүмкіндік беру. Сонымен қатар, өлең жазу, шешендік өнер, түрлі ұлттық аспапта ойнау сияқты қабілеттерін ұштап, болашақта кәсіби салада өзін-өзі дамытуға жол ашу.

"Ақберен" байқауы әр түрлі номинациялар бойынша өтеді және бұл жолы байқау 6 негізгі бағытта ұйымдастырылды: «Шешендік, білгірлік сайысы», «Көркемсөз оқу», «Эссе жазу», «Ұлттық аспапта өнер көрсету», «Ақындар айтысы», «Ақындар мүшәйрасы». Әр номинацияда оқушылар өздерінің шығармашылық қабілеттерін, өнерін және танымдық дағдыларын ортаға салды.

Республикалық кезеңге еліміздің түкпір-түкпірінен 8-11 сыныптардағы талантты оқушылар қатысты. Олардың қатарында Шымкент қаласынан келген бірнеше дарынды жас өрендер де болды. Мәселен, «Шешендік, білгірлік сайысы» номинациясында Д.А. Қонаев атындағы жалпы орта мектебінің 9 сынып оқушысы Сайлау Асылым, «Көркемсөз оқу» номинациясында №106 «Қайнарбұлақ» мектебінің 8 сынып оқушысы Медеухан Нұрасыл, «Эссе жазу» номинациясында №132 мектептің 11 сынып оқушысы Куралбек Лаура және тағы басқа жас өнерпаздар өздерін көрсетіп, бақ сынады.

Байқау қорытындысы бойынша жүлделі орындар анықталды. «Ақындар мүшәйрасы» номинациясында ерекше көзге түскен оқушылардың бірі – Ибрагим Ақзере (№1 Talant мектебінің 10 сынып оқушысы), ол III орынды иеленді. Сондай-ақ, «Ұлттық аспапта өнер көрсету» номинациясында Байданов Батырхан (Саттар Ерубаев атындағы №24 ІТ мектеп-лицейінің 10 сынып оқушысы) III орынды жеңіп алды. Ал ең жоғарғы көрсеткішті «Эссе жазу» номинациясында үздік шыққан Куралбек Лаура (№132 мектеп, 11 сынып оқушысы) көрсетті, ол байқаудың I орнын жеңіп алды.

Бұл байқау жастардың шығармашылық қабілеттерін дамытудың және мәдениетті қолдаудың маңызды қадамы. Сондай-ақ, республикалық деңгейде өткен шара жастарды ынталандырып, оларды жаңа шыңдарға жетелейтін мол мүмкіндіктерге жол ашады. Талантты жас өрендер өздерінің шығармашылығымен, шеберлігімен көзге түсіп, болашақта еліміздің мәдениеті мен өнерін дамытуда өз үлестерін қосатыны сөзсіз. Байқаудың нәтижесі бойынша жеңімпаздарға дипломдар мен бағалы сыйлықтар табысталып, олардың шығармашылық жетістіктері мен еңбекқорлығы еленді.

"Ақберен" өнер байқауы – жастардың өзін-өзі тануға, шығармашылықпен айналысуға және кәсіби тұрғыда даму жолындағы алғашқы қадамдарын жасауларына ықпал ететін үлкен платформа болып табылады. Байқау соңында оқушылар мен ұстаздарға жаңа жетістіктерге жетуге арналған ынталандырушы сыйлықтар мен арнайы сертификаттар ұсынылды.