Сайрам ауданында 2025 жылдың алғашқы төрт айындағы әлеуметтік-экономикалық дамудың аралық қорытындылары кеңінен сараланып, салалар бойынша нақты талдаулар жасалды. Бұл туралы аудан әкімі Арман Сабитовтың төрағалығымен өткен кезекті лездемелік аппарат мәжілісінде айтылды. Жиын барысында ауданның барлық сала жетекшілері, бөлім басшылары мен ауылдық округ әкімдері қатысып, межеленген жоспарлардың орындалу барысына тоқталды.

Мәжілісте аудандық экономика және қаржы бөлімінің басшысы Алтынай Қалдарқызы арнайы баяндама жасап, қаңтар-сәуір айлары аралығында аудан бойынша негізгі әлеуметтік-экономикалық көрсеткіштердегі динамиканы кеңінен баяндады. Оның айтуынша, аудан экономикасында жалпы оң өсім байқалғанымен, бірқатар салаларда межелі деңгейге жете алмау деректері бар.

Атап айтқанда, Сайрам ауданының жалпы өңірлік өнім көлемі 2025 жылдың алғашқы төрт айында 84,6 миллиард теңгені құрап, өткен жылдың сәйкес кезеңімен салыстырғанда 28,8 пайызға артқан. Бұл — өңір экономикасының әлеуеті мен өндірістік секторда қалыптасқан оң үрдістердің айқын көрінісі. Дегенмен, бұл көрсеткіштің артында жан-жақты талдау мен сапалы түсіндіруді қажет ететін салалық мәселелер де жоқ емес.

Баяндамада атап өтілгендей, өңдеу өнеркәсібі мен электр қуатын өндіру салаларында жоспардан жоғары көрсеткіштер тіркеліп, өндірістік белсенділік айтарлықтай артқан. Бұл көрсеткіштер экономиканы әртараптандырудың тиімді жолға қойыла бастағанын білдіреді.

Алайда ауыл шаруашылығы секторы бойынша нақты көлем индексі (НКИ) 106,5% деңгейінде болуы тиіс болса, ол 101,9% деңгейінде қалып қойған. Ауыл шаруашылығы – аудан экономикасының негізгі тірегі. Сондықтан бұл саладағы көрсеткіштердің төмендеуі мамандар мен жауапты басшылар тарапынан жіті бақылау мен жүйелі жұмыстың жетіспейтінін аңғартады.

Аудан әкімі ауыл шаруашылығындағы кемшіліктердің себебін терең зерттеуді және қажетті қолдау шараларын ұйымдастыруды тиісті сала жетекшілеріне тапсырды. Шаруалармен тікелей жұмыс жасап, агроөнеркәсіп кешеніндегі өнімділікті арттыруға бағытталған нақты жобаларды қолға алу қажеттігі айтылды.

Аудан экономикасындағы әлсіз буындардың бірі ретінде құрылыс және тұрғын үй секторлары аталды. Төрт ай ішінде құрылыс жұмыстарының жалпы көлемі небәрі 2,6 миллиард теңгені құрап, бұл сала бойынша жоспардан едәуір кейін қалған. Сонымен қатар, тұрғын үй беру көрсеткіші де межеленген жоспарға жетпей отыр.

Бұл – халықтың өмір сүру сапасына тікелей әсер ететін маңызды сала. Әкімдік тарапынан жаңа құрылыс жобалары мен тұрғын үй құрылысына салынатын инвестицияларды көбейту, мемлекеттік бағдарламалар шеңберінде тұрғын үймен қамту тетіктерін жетілдіру мәселесі күн тәртібіне қойылды.

Ауданның облыстық рейтингтегі орны да жиынның өзекті тақырыптарының бірі болды. 2025 жылдың бірінші тоқсанының қорытындысы бойынша Сайрам ауданы 75 көрсеткіштің тек 59-ын ғана орындай отырып, облыс бойынша 10-орынға төмендеген. Бұл — аудан көлемінде бірқатар жүйелі өзгерістер мен шешімдерді қажет ететін дабыл.

Орындалмай қалған 16 көрсеткіштің басым көпшілігі құрылыс, құқық қорғау, ауыл шаруашылығы және білім беру салаларына тиесілі. Бұл сала басшылары жиын барысында жеке-жеке тыңдалып, нақты тапсырмалар алды. Аудан әкімі орынбасарлары мен салалық бөлім басшыларына көрсеткіштерді түзету бойынша жол картасын әзірлеп, әр салада нақты нәтижелерге қол жеткізуді тапсырды.

Жиынды қорытындылаған аудан әкімі Арман Сабитов әрбір сала жетекшісіне үлкен жауапкершілік жүктелетінін және атқарылған жұмыс тек санмен емес, сапамен де өлшенуі керектігін қатаң ескертті.

Аудан басшысы сонымен қатар, жоспарлы жұмыстарға мониторинг жүргізуді күшейтіп, ауыл әкімдеріне жергілікті тұрғындармен тығыз байланыс орнатып, экономикалық белсенділікті арттыру бағытында шаралар қабылдауды тапсырды. Сонымен қатар, әкімдік аппаратына әр сала бойынша апта сайынғы мониторингтік есеп ұсыну жүктелді.