Балым Жорабекова, көпбалалы ана:

«Таза Қазақстан» акциясының арқасында біздің ауданымыздың көшелері біртіндеп көркейіп, ауламызда жаңа тыныс пайда болғанын қуана атап өткім келеді. Әсіресе, балаларымыздың таза ортада ойнап жүргенін көру – әрбір ата-ана үшін ең үлкен қуаныш. Көпбалалы ана ретінде айтарым – мұндай іс-шаралардың тәрбиелік мәні өте зор.

Соңғы сенбілік барысында ауламыз ретке келтіріліп, қоқыстан тазартылды, жасыл аймақ әдемі көрініске ие болды. Балаларым бұл жұмыстарға өз көздерімен куә болып, үлкендердің еңбегін көрді. Бірі сыпырғыш әкеліп берсе, бірі қоқыс жинағандарға су тасуға көмектесті. Бұл – олардың табиғатты қорғауға деген көзқарасын қалыптастыратын баға жетпес тәжірибе. Отбасында қанша айтқаннан гөрі, осындай нақты істердің әсері әлдеқайда күшті екенін түсіндім.

Тазалық – тек санитарлық талап емес, ол – отбасылық құндылықпен тығыз байланысты ұғым. Егер біз өз үйімізді, ауламызды таза ұстасақ, балаларымыз да соған үйренеді. Әр шаңырақ өзінің ордасын күтіп-баптап отырса, бүкіл қоғам да соған сәйкес қалыптасады. Қоғамдағы тазалықтың бастауы – әр отбасының қарапайым әдеттерінен басталатынын түсінген жөн.

Акция барысында тұрғындардың бір-бірімен бірлесе еңбек еткені ерекше қуантты. Көршілер бір-біріне қолғабыс жасап, ауызбіршілігін көрсетті. Бұл да үлкен тәрбие. Себебі, бала көргенін істейді. Егер ол ата-анасының сенбілікте белсенді еңбек еткенін көрсе, ол да қоғамға пайдалы азамат болып өседі. Міне, тазалық арқылы біз тек айналаны көркейтіп қана қоймай, болашақ ұрпаққа өнеге боларлық үлгі қалдырамыз.

Осындай шаралардың арқасында біздің ауданымыздың келбеті күннен-күнге жақсарып келеді. Бұл тек әкімдік жұмысының емес, барша тұрғындардың ортақ еңбегінің нәтижесі. Әр адам қолынан келгенше үлес қосса, үлкен жетістіктерге жетуге болады. Мен барлық ата-аналарды балаларымен бірге мұндай акцияларға қатысуға шақырамын. Бұл – тек тазалық үшін емес, ұрпақ тәрбиесіне қосылған үлкен үлес.

«Таза Қазақстан» акциясы – жай ғана сенбілік емес, ол әрбір жанұяны ортақ іске жұмылдыратын тәрбиелік мектеп. Бүгінгі балаларымыздың бойына сіңген тазалық мәдениеті ертеңгі күні олардың өмірлік ұстанымына айналары сөзсіз. Сондықтан біз осындай бастамаларды әрдайым қолдап, белсенділік танытқанымыз жөн. Тазалықты сақтау – болашаққа аманат!