Күнде еститініміз – жол апаты. Жиілеп кеткені соншалық, адам өлімін ауыр қабылдамайтын болыппыз. «Жүргізушілер қатты жүреді» дейміз де қоямыз. Жылдамдықты асыру. Жауапсыздық. Жантүршігерлік жол апаттарының басты себептері осылар. Бұған жолдың сапасыздығын қосыңыз. Жоғары жылдамдықпен жүруді жаман әдетке айналдырған жауапсыз жүргізушілердің кесірінен елімізде күн сайын жол-көлік апаты болып жатады. Екі күннің бірінде күре жол үстіндегі қайғылы оқиғадан талай жанның тағдыры үзіліп, талайы ауыр жарақатынан айығып кете алмай, өмір бойына мүгедек болып қалып жатыр. Қара жол бойындағы қасіретті жағдайлар азаймай тұр. Адамның айдың-күннің аманында жарық дүниеден мезгілсіз өтіп кеткенінен артық қасірет жоқ. Төтелеп келген ажал ата-анасы болашағынан үміт күткен жасты, әсіресе буыны қатып үлгермеген баланы жұлып әкетсе, тіпті жаның жұтап, сең соққандай есеңгіреп қаласың.
«Асыққан – шайтанның ісі» деген сөз бар. Жаны бар сөз. Қарапайым ғана қағида. Жол ережесін сақтау – әрбір адамның өз өміріне деген жауапкершілігі әрі бірден-бір кепілдігі. Жолды жөндеуге болады, жол қауіпсіздігін қамтамасыз ететін заңнаманы жетілдіру де уақыттың еншісіндегі іс. Алайда «темір тұлпар» тізгіндегендердің тәртібі түзелмей, жылдамдықпен ойнаған жүргізушілердің желігі басылмай, әр жүргінші өз жауапкершілігін жете түсінбей жағдайдың оңға басуы қиын.
Жарақаттанудан қаза болудың алдыңғы қатар себептерінің бірі жол-көлік оқиғасы болып табылады. Жол қозғалысы ережесін бұзудың ең өрескел қателіктерінің бірі - мас күйінде көлік басқару болып табылады. Шаһарымызда жол қауіпсіздігі шаралары күшейтілуде. Жүгенсіз жүргізушілер арнайы көлік бақылауында болмақ. Осы арқылы кей ұйымдар да жүргізушілерді тәртіпке шақырмақ. Жол ережесін сақтамай, заңды белшесінен басқандардың мәселесін қолға алды. Осы ретте, Түркістан қаласы аумағында жол жүрісі қағидаларын сақтау және жол-көлік оқиғаларының алдын алу мақсатында 22-27 сәуір аралығында “Қауіпсіз жол” жедел-профилактикалық іс-шарасы өтті.
Іс-шара барысында полиция қызметкерлері жүргізушілерге жол көлік оқиғасын алдын алу бойынша арнайы ескерту парақтарын таратылды.
Құрметті жүргізушілер!
Автокөлікті басқару кезінде жылдамдықты асырмай, жол жүрісі қағидаларын қатаң сақтап, өзге жол жүрісі қатысушыларына сыйластық танытып, жол көлік оқиғасын алдын алуға шақырамыз!
Жүргізушіге «жолда байқап жүр» деп айту аздық етер. Жол ережесін сақтамасаң ырым қылып таққан тәсбихтің де пайдасы шамалы. Кейбір жүргізушілер сапасыз жолды, бағусыз малды себеп етіп өздерін ақтағандай болады. Көлік тізгіндеген адам өзінің өміріне ғана емес, көлік ішіндегі адамдардың тағдырына да жауапты екенін ұмытпағаны абзал.