Өңірдегі жағдай туралы республикалық ақпараттық штабта өткен брифингте Қостанай облысы әкімдігінің жұмылдыру дайындығы, аумақтық қорғаныс және азаматтық қорғау басқармасының басшысы Диас Қабдушев хабарлады.

Оның айтуынша, облыстың 3 негізгі су қоймасы штаттық режимде жұмыс істейді.

«Қаратомар су қоймасынан суды жіберу 300 м3/с дейін төмендеді, су тасқынының белсенді кезеңінде суды жіберу 3300 м3/с-қа жетті, сондай - ақ Жоғарғы Тобыл және Желқуар су қоймаларынан су жіберудің төмендеуі тіркелді», - деп нақтылады спикер.

51 жеке тұрғын үй су астында қалады. Қазіргі уақытта облыс бойынша 9 114 адам эвакуацияланды, уақытша орналастыру пунктерінде 189 адам бар, қалғандары туыстарына орналастырылды.

«Қостанай қаласының тыныс - тіршілігін қамтамасыз ететін 3 көпірде кезекпен қозғалыс шектелді, 2 көпір ашылды», - деп атап өтті Диас Қабдушев.

Залалды бағалау, сондай-ақ барлық зардап шеккен тұрғындарға көмек көрсету жөніндегі комиссиялардың жұмысы жалғасуда. Мал өлімі бойынша өтемақы төленеді. Ветеринариялық қызметтің мәліметінше, 214 бас өлген малға төлем жасалды. Қазіргі уақытта 1051 отбасына 200 млн теңге сомасында әлеуметтік көмек төленді.