Қазір қоғамға интеллектуал адамдар көбірек қажет. Ал шахмат - адамның ақыл-ойын дамытатын бірден-бір ойын. Сондай-ақ, Шахмат – өнер, ғылым және спорт элементтерін біріктіретін, қарсыластар үшін 64 торша тақтасында арнайы фигуралармен үстел үсті логикалық ойыны. Шахмат ойнау әлеуметтік дағдыларды дамытуға ықпал етеді, байланыстарды нығайтады және жаңа достар табуға көмектеседі. Шахмат жарыстары мен клубтары басқа ойыншылармен араласуға, тәжірибе алмасуға және әртүрлі ойын мәнерлерін зерттеуге мүмкіндік береді. Шахмат – балаларға да, ересектерге де пайдалы болатын қызықты ойын. Бұл ойын түрі ақыл-ой дағдыларын дамытып, зейінді жақсартумен қатар, жоспарлау мен болжауды үйретеді. 

    Осы орайда, Үшінші мегополисте, Қазақстан Республикасы Парламенті Сенатының бастамасымен Қазақстан шахмат федерациясы, Шымкент қаласы мәслихатының ұйымдастыруымен әуесқойлар арасында шахмат турнирі бастау алған болатын. Іріктеу турниріне қатысуға Шымкент қаласы мәслихатының депутаттары Қоғамдық кеңес мүшелері, ардагерлер, қоғам белсенділері мен БАҚ өкілдерінен 120 дан аса өтінім келіп түскен. Шахматшыларды іріктеу барысында 7 мүшеден құрылған төрешілер алқасы ойыншыларды қадағалады.

     Интеллектуалды ойынның қорытындысы бойынша қатысушылар командалық және жекелей 1, 2, 3 – орындармен марапатталды. Сонымен төрешілер шешіміне сәйкес жеке құрамда сайысқа түскен Әл-Фараби ауданынан Сейтжан Джаханов 1-ші орынды иеленсе, 2-ші орын Абай ауданынан сынға түскен Нұрсұлтан Жұмадуллаевқа бұйырды. 3-ші орынға Әл-Фараби ауданынан қатысқан Сұлтан Садықов жайғасты. Ал командалық есепте 1-ші орын Әл-Фараби ауданы, 2-орын Абай ауданы, 3-ші орын Қаратау ауданына бұйырды. Барлық шахмат ойынына қатысқан жеңімпаздарға арнайы диплом, медаль табыс етілді.

         Ынталандыру марапаттары бойынша депутаттар, БАҚ өкілдері, қоғам белсенділері және әйелдер арасында үздік көрсеткіш иелері мен зейнеткерлер арасында үздік деп танылған қатысушылар арнайы грамотамен марапатталды.Сондай-ақ қатысушыларға сертификат берілді.

     Іріктеуден өткен 25 үздік шахматшыға 18 маусым күні қала күніне орай Шымкент қаласында өтетін өңірлік жартылай финалға жолдама берілді. Жартылай финалдан өткен жеңімпаздар алдағы уақытта Астана қаласында өтетін финалдық ойындарда бақтарын сынайды.