Шымкент қаласында экологиялық мәдениетті нығайту және санитарлық тазалықты сақтау мақсатында кең ауқымды сенбілік өтті. Бұл іс-шара республикалық деңгейде қолға алынған «Таза Қазақстан» бағдарламасы аясында ұйымдастырылып, оған мемлекеттік мекемелердің өкілдері, коммуналдық қызметкерлер, білім және әлеуметтік сала мамандары, сондай-ақ қала тұрғындары белсенді қатысты.

Тазалық шаралары таңғы сағат 09:00-де Тұран ауданы, Құрсай шағынауданында бастау алды. Мұнда мал базары аумағы, мұсылман және христиан мазараттарының төңірегі және тасжол бойы қоқыстан тазартылды. Қоршаған ортаға зиян келтіріп отырған бейберекет төгілген қалдықтар арнайы техниканың көмегімен шығарылып, аумақ санитарлық талаптарға сәйкес ретке келтірілді.

Іс-шараға арнайы қатысқан Қоғамның орта сапасын дамыту бөлімінің басшысы Дәурен Сыдықұлы сенбіліктің маңыздылығына тоқталып өтті. Оның айтуынша, бұл жолы тек Құрсай аумағында 200-ге жуық адам жұмылдырылды. Қатысушылар қатарында коммуналдық қызмет мамандары, аудан әкімдігі аппаратының қызметкерлері, әлеуметтік мекемелер ұжымдары және жергілікті тұрғындар бар. Сондай-ақ, қаланың өзге аудандарынан да сенбілікке белсенді қолдау көрсетілді. Жалпы Шымкент бойынша сенбілікке 700-ге жуық адам және 20-дан астам арнайы техника тартылған.

«Бұл – Шымкентті таза әрі көрікті қалаға айналдырудағы маңызды қадам. Қаланың әрбір тұрғыны тазалыққа үлес қосса, ортақ мақсатымызға жетеміз», – деді ол.

Сенбілік барысында қураған арамшөптер орып тасталды, жасыл аймақтар ретке келтірілді. Көшелердің жиектері, арық-атыздар, жаяу жүргіншілер жолдары тазартылып, қоғамдық аумақтар санитарлық тұрғыдан реттелді. Жиналған қалдықтар белгіленген полигондарға жеткізілді.

Айта кетейік, тазалық жұмыстары Құрсай шағынауданымен шектелген жоқ. Қаланың басқа да аумақтарында денсаулық сақтау, дене шынықтыру және спорт, цифрландыру, мемлекеттік сатып алу және жұмылдыру басқармаларының қызметкерлері де белсенділік танытып, көшелерді қоқыстан арылтты. Әрбір мекеме өз аумағын ретке келтіріп қана қоймай, тұрғындарға үлгі көрсетуді мақсат етті.

Ұйымдастырушылардың айтуынша, мұндай экологиялық акциялар бір реттік емес, жүйелі түрде өткізіліп отырады. «Таза Қазақстан» бағдарламасының басты мақсаты – тұрғындарды қоршаған ортаны қорғауға шақыру, табиғатты аялау және қоғамда экологиялық мәдениетті қалыптастыру. Қоршаған ортаға қамқорлық таныту – әрбір азаматтың міндеті екені айрықша атап өтілді.

Сенбілік қорытындысында аудан тұрғындары ұйымдастырушыларға ризашылығын білдіріп, мұндай игі шараларға алдағы уақытта да белсене қатысуға дайын екендіктерін жеткізді.

Қала әкімдігі мен аудандық органдардың мәлімдеуінше, тазалық жұмыстары бұдан әрі де тұрақты жүргізіліп, бейберекет қоқыс тастауға жол бермеу үшін тұрақты бақылау орнатылады. Сонымен қатар, қоқыс шығару тәртібін бұзғандарға заң аясында әкімшілік жауапкершілік қарастырылған.

Қорытындылай келе, «Таза Қазақстан» акциясы тек санитарлық тазалықты қамтамасыз ету шарасы ғана емес, ол – ортақ жауапкершілікке үндейтін, табиғатқа деген құрметті арттыратын маңызды бастама. Шымкент тұрғындарының ұйымшылдығы мен белсенділігі нәтижесінде қала аумағы біршама тазарып, жайлы орта қалыптастыруға үлкен қадам жасалды.