Қазіргі таңда Шымкент қаласына қарасты Тұран ауданының Ақтас, Айкөл және Құрсай шағын аудандарында тұрғындардың тұрмыс сапасын арттыруға бағытталған кешенді инфрақұрылымдық жаңғырту жұмыстары кең көлемде жүзеге асырылуда. Аталған аумақтарда жылдар бойы қордаланған жол мәселесі, аяқ жолдардың тозуы және ирригациялық жүйелердің жеткіліксіздігі кезең-кезеңімен шешімін тауып келеді.

Бүгінде шағын аудандардың негізгі және ішкі көшелеріне жаңа асфальт жамылғысы төселіп, көлік қозғалысы үшін қолайлы жағдай жасалуда. Бұрынғы шұрық-тесік жолдар толықтай тегістеліп, бірнеше қабаттан тұратын сапалы асфальтпен жабылуда. Бұл өз кезегінде көліктердің жүріп-тұруын жеңілдетіп, жол-көлік оқиғаларының алдын алуға мүмкіндік береді. Сонымен қатар жаяу жүргіншілердің қауіпсіздігі үшін аяқ жолдарды жаңарту жұмыстары да қарқын алған. Көптен бері жөндеу көрмеген тротуарлар қайта плиткаланып, мүмкіндігі шектеулі жандарға да ыңғайлы етіп жасалуда.

Сонымен бірге жауын-шашын мен еріген қар суларын тиімді бағыттау мақсатында ирригациялық жүйелер салу және қайта жаңарту жұмыстары қолға алынған. Арық-атыздар тазартылып, кей көшелерде мүлде жаңа су бұру желілері жүргізілуде. Бұл әсіресе көктем мен күз мезгілдерінде жиі орын алатын су жиналу мәселесін едәуір азайтуға мүмкіндік бермек.

Жүргізіліп жатқан жұмыстар кезең-кезеңімен, бекітілген жоспарға сәйкес атқарылуда. Әрбір нысанның сапасы қатаң бақылауда болып, мердігер ұйымдардың жауапкершілігі күшейтілген. Құрылыс барысында қауіпсіздік талаптарының сақталуына да ерекше мән беріліп отыр. Сонымен қатар тұрғындар тарапынан түскен ұсыныс-пікірлер де назарға алынуда.

Инфрақұрылымды жаңғырту – тек жол салумен шектелмейтін, ұзақ мерзімді нәтижеге бағытталған маңызды жұмыс. Бұл бастамалар шағын аудандардың келбетін жаңартып қана қоймай, аумақтың әлеуметтік-экономикалық дамуына да оң әсерін тигізері сөзсіз. Жаңарған көшелер, ретке келтірілген инженерлік жүйелер мен заманауи аяқ жолдар тұрғындардың күнделікті өмірін жеңілдетіп, қауіпсіз қозғалысты қамтамасыз етеді.

Алдағы уақытта Тұран ауданы бойынша мұндай ауқымды жұмыстар басқа да шағын аудандарда жалғасын табады деп жоспарлануда. Бұл өз кезегінде қала инфрақұрылымын дамытуға және тұрғындар үшін қолайлы орта қалыптастыруға бағытталған жүйелі жұмыстың бір бөлігі болмақ.