Елімізде жалпыреспубликалық «Таза Қазақстан» экологиялық акциясы ұйымдастырылып, оған барлық өңірлер белсене қатысты. Аталған бастама аясында Шымкент қаласының Тұран ауданында да кең көлемді сенбілік өткізілді. Іс-шара барысында қоршаған ортаны қорғау, тұрмыстық қалдықтарды жою және қоғамдық аумақтардың санитарлық жағдайын жақсарту бағытында ауқымды жұмыстар атқарылды.

Акцияның басты мақсаты – экологиялық мәдениетті қалыптастыру, тұрғындарды табиғатты аялауға шақыру және елді мекендерде тазалықты қамтамасыз ету. Табиғатты қорғау мәселесі қазіргі таңда аса өзекті. Өйткені бейберекет тасталған қоқыс қоршаған ортаға зиянын тигізіп қана қоймай, тұрғындардың өмір сапасына да әсер ететіні белгілі.

Сенбілікке аудан тұрғындары, коммуналдық қызметкерлер, мектеп пен балабақша ұжымдары, сондай-ақ Тұран ауданы әкімі аппаратының қызметкерлері белсене қатысты. Бірлескен іс-қимылдың нәтижесінде аудан аумағында қомақты жұмыстар атқарылды.

Жұмыс барысында тұрғын үйлердің маңы, көшелер мен жаяу жүргінші жолдары, арық-атыздар мен қоғамдық орындар қоқыстан тазартылды. Құрсай шағынауданы аумағындағы мұсылман және христиан мазаратының маңы ретке келтіріліп, бейберекет төгілген қоқыс арнайы техника көмегімен шығарылды. Сонымен қатар, қураған шөптер орылып, жасыл аймақтар тазаланып, аумақ санитарлық талаптарға сәйкестендірілді. Бұл жұмыстарға ауыр жүк көліктері, тракторлар мен арнайы қоқыс шығаратын техника жұмылдырылды.

Аудан әкімдігі өкілдерінің айтуынша, мұндай акциялар тек тазалықты қамтамасыз етумен шектелмейді. Ең бастысы – тұрғындардың бойында экологиялық мәдениетті нығайту, қоршаған ортаға деген жауапкершілікті арттыру. «Таза Қазақстан» акциясы арқылы әрбір азамат өз ортасына бейжай қарамай, табиғатты қорғау ісіне үлес қосуы тиіс. Табиғат — баршамызға ортақ, оны сақтау — ортақ міндет.

Сенбілікке қатысқан тұрғындар да бұл бастаманы оң қабылдады. Олардың пікірінше, мұндай игі шаралар тек тазалықты сақтап қана қоймай, қоғамда бірлік пен ұйымшылдықты арттырады. «Бүгін біз бірлесіп еңбек етіп, қоршаған ортаны тазарттық. Әрбір адам өз үйінің ауласынан бастап тазалыққа мән берсе, қаламыз әлдеқайда көркейіп, таза әрі жайлы орта қалыптасатыны сөзсіз», – дейді қатысушылардың бірі.

Тұран ауданы әкімдігі алдағы уақытта да санитарлық тазалық шараларын жүйелі түрде жалғастыра бермек. Әкімдік мамандарының айтуынша, тұрғындармен түсіндіру жұмыстары да қатар жүргізіліп жатыр. Яғни, тұрмыстық қатты қалдықтарды арнайы контейнерлерге ғана төгу, құрылыс қалдықтарын полигондарға жеткізу талаптары түсіндірілуде. Бұл – заң талабы әрі әрбір азаматтың экологиялық жауапкершілігінің көрінісі.

Жалпы, «Таза Қазақстан» экологиялық акциясы – тек сенбілік емес, табиғатты қорғауға бағытталған кең ауқымды қоғамдық қозғалыс. Мұндай бастамалар тұрғындардың қоршаған ортаға деген көзқарасын өзгертіп, болашақ ұрпаққа таза әрі жайлы орта қалыптастыруға септігін тигізеді.

Аудан әкімдігі қоршаған ортаны қорғау бағытындағы шараларды жүйелі түрде жалғастыра отырып, әрбір тұрғынды табиғатқа жанашырлықпен қарауға және қала аумағының тазалығына үлес қосуға шақырады.