Шымкент қаласының жаңа дамып келе жатқан аумақтарының бірі – Тұран ауданы. Мұнда тұрғын үйлер саны артып, жаңа әлеуметтік нысандар бой көтеруде. Халық санының өсуі санитарлық тазалық мәселесіне де жіті назар аударуды қажет етеді.

«Таза Қазақстан» республикалық жобасы аясында аудан көлемінде жүйелі түрде тазалық жұмыстары атқарылуда. Көшелерді қоқыстан тазарту, аулаларды абаттандыру, шөп-шаламды шауып, ағаш түбін әктеу сияқты шаралар тұрақты түрде жүргізіліп келеді. Әсіресе жаз айларында тұрмыстық қалдық көлемі артатындықтан, арнайы мекемелердің қызметкерлері мен еріктілердің қатысуымен сенбіліктер жиі ұйымдастырылады.

Аудан тұрғыны Билал Диана бұл бастамалардың тұрғындар үшін өте маңызды екенін айтады. Оның пікірінше, әрбір азамат өз ауласына және көшесіне жауапкершілікпен қараса, жалпы ауданның да келбеті жақсарады. «Біз балаларымызға таза әрі жайлы орта қалдыруымыз керек. Сенбіліктерге қатысу арқылы өз үлесімізді қосып жүргенімізге қуаныштымыз», – дейді ол.

Сонымен қатар экологиялық мәдениетті қалыптастыру бағытында да жұмыстар атқарылуда. Білім беру ұйымдарында оқушылар мен жастар арасында акциялар, экологиялық челлендждер өткізіліп, табиғатты қорғаудың маңызы түсіндірілуде. Мұндай шаралар жас буынға қоршаған ортаға деген жауапкершілікті дарытып, «таза орта – салауатты қоғам» қағидасын кеңінен насихаттауға жол ашады.

Көгалдандыру ісі де назардан тыс қалған жоқ. Жыл сайын аудан аумағында мыңдаған жасыл желек отырғызылып, олардың күтімі жасалады. Жаңа саябақтар мен гүлзарлар салынып, тұрғындарға қолайлы демалыс аймақтары ашылуда. Бұл бір жағынан ауа сапасын жақсартса, екінші жағынан ауданның көркін арттыруға септігін тигізуде.

Сонымен қатар заңсыз қоқыс төгумен күрес шаралары күшейтілді. Арнайы рейдтік тексерулер ұйымдастырылып, ереже бұзғандарға әкімшілік шара қолданылуда. Қоғамдық бақылаудың артуы тұрғындардың да тазалыққа деген көзқарасын өзгертіп, әрбір адамның өз үйінің ауласына жауапкершілігін арттыра түсті.

Жалпы алғанда, «Таза Қазақстан» жобасының Тұран ауданында жүзеге асырылуы нақты нәтижесін беріп отыр. Бұл бастама тек қана экологиялық ахуалды жақсартуға емес, тұрғындардың өмір сапасын арттыруға, жаңа мәдениетті қалыптастыруға бағытталған. Тазалықты сақтау – әрбір азаматтың ортақ міндеті, ал бірлікпен жасалған іс – ауданның дамуына серпін беретіні сөзсіз.