Тұран ауданы соңғы жылдары Шымкенттің қарқынды дамып келе жатқан аймақтарының біріне айналды. Бұл аумақта жаңа тұрғын үйлер бой көтеріп, әлеуметтік нысандар мен жол инфрақұрылымы жүйелі түрде жаңарып келеді. Қала халқының өсуіне байланысты ауданның инфрақұрылымын дамыту – уақыт талабы және тұрғындардың өмір сапасын арттырудың басты кепілі.

Қазіргі таңда Тұран ауданында ішкі орам көшелеріне асфальт төсеу, жаяу жүргіншілер жолдарын салу, жарықтандыру желілерін орнату және аулаларды абаттандыру жұмыстары кең көлемде жүргізілуде. Сонымен қатар инженерлік-коммуникациялық инфрақұрылым – ауызсу, кәріз және электр желілерін тарту бағытында да айтарлықтай жұмыстар атқарылып жатыр.

Тұран ауданының тұрғыны Бекзат Қалдыбай бұл өзгерістерге өз пікірін білдірді:
– «Соңғы жылдары ауданымыз айтарлықтай өзгерді. Бұрын кей көшелерде жол жоқ, жарық аз, балалар ойнайтын орын тапшы болатын. Қазір бәрі біртіндеп түзеліп келеді. Асфальт төселіп, көшелер жарықтандырылды, ауламызға жаңа ойын алаңы орнатылды. Осындай игі істердің жалғасқанына қуаныштымыз. Бұл тұрғындардың өмірін әлдеқайда ыңғайлы әрі қауіпсіз етті», – дейді ол.

Аудан аумағында жаңа мектептер мен балабақшалар салынып, қоғамдық көлік бағыттары кеңеюде. Сонымен қатар тұрғындарға қолайлы орта қалыптастыру мақсатында саябақтар мен гүлзарлар көбейіп, көгалдандыру жұмыстары жүйелі түрде жүргізілуде.

Тағы бір тұрғын, кәсіпкер Гүлнұр Әлімбекова өз ойын былай жеткізді:
– «Тұран ауданы – болашағы зор аймақ. Мұнда жаңа тұрғын үйлермен бірге бизнеске де мүмкіндік көбейіп келеді. Жолдар жақсарды, инфрақұрылым дамып жатыр. Осындай жағдайлар кәсіп ашуға, халыққа қызмет көрсетуге қолайлы орта қалыптастырады. Ең бастысы – тұрақтылық пен даму бар», – деді ол.

Қазіргі уақытта аудан әкімдігі тарапынан қоғамдық көліктердің қозғалысын оңтайландыру, аялдамаларды ретке келтіру және жол қауіпсіздігін күшейту бағытында да жұмыстар атқарылуда. Бұл өз кезегінде тұрғындардың қозғалысын жеңілдетіп, тұрмыс сапасын арттырады.

Инфрақұрылымдық даму – тек құрылыс пен жол жөндеу емес, бұл – адамдардың өмір сүру сапасын жақсарту, жайлы әрі қауіпсіз орта қалыптастыру. Тұран ауданындағы атқарылып жатқан жұмыстар – Шымкенттің жаңа келбетін қалыптастырудағы маңызды қадам.

 Тұрғындардың пікірінше, ең бастысы – бұл істердің жүйелі түрде жалғасуы. Себебі заманауи инфрақұрылым – дамыған қоғамның айнасы, ал Тұран бүгінде сол жаңарған, өркендеп келе жатқан қаланың жарқын мысалына айналып отыр.