Түркістан облысының Ленгір қаласында тұрғынның үйіне заңсыз кіріп, оған күш қолданды және ұялы телефонын алып кетті деген күдікпен екі ер адам ұсталды. Қазіргі уақытта аталған факті бойынша қылмыстық іс қозғалып, тергеу амалдары жүргізіліп жатыр. Полицияның мәліметінше, оқиға түнгі уақытта болған. Алдын ала ақпарат бойынша, екі адам жергілікті тұрғынның үйіне кіріп, үй иесіне дене жарақатын салған. Кейін оның ұялы телефонын алып, оқиға орнынан кеткен.

Оқиғадан кейін әйелдің жарақат алғаны туралы бейнематериал әлеуметтік желілерде тараған. Кадрларда тұрғынның беті ісініп, денесінде түрлі жарақаттар бар екені байқалады. Сондай-ақ үй ішіндегі заттардың шашылып, жиһаздардың орнынан қозғалғаны көрінеді. Әлеуметтік желіде тараған ақпаратқа сәйкес, шабуыл жасаған адамдардың бетперде таққаны және әйелді белгілі бір уақыт бойы үйден шығармай ұстағаны айтылған. Алайда бұл деректердің барлығы тергеу барысында тексеріледі. Оқиға туралы ақпарат түскеннен кейін Түркістан облысы полиция департаментінің криминалдық полиция қызметкерлері жедел-іздестіру шараларын ұйымдастырды. Нәтижесінде күдікті ретінде Төлеби ауданының екі тұрғыны анықталып, ұсталды. Полицияның хабарлауынша, күдіктілер қамауға алынған. Аталған дерек бойынша қылмыстық іс қозғалды.

Қазіргі таңда тергеу барысында оқиғаның барлық мән-жайы анықталып жатыр. Күдіктілердің әрекетіне құқықтық баға беріліп, олардың қылмысқа қатысы мен оқиғаның нақты себептері тексерілуде. Тергеу барысы Түркістан облысы полиция департаменті басшылығының бақылауында. Қылмыстық іс бойынша өзге мәліметтер тергеу мүддесіне байланысты әзірге жарияланған жоқ.