Air Astana әуе компаниясы Таяу Шығыстағы ахуалға байланысты Дубай бағытына жоспарланған бірқатар рейстердің орындалмайтынын хабарлады. Компанияның мәліметінше, 12 шілде күні сағат 07:10-да Астанадан Дубайға бағыт алған KC205 рейсі қауіпсіздік мақсатында кері бұрылып, Астана әуежайына қайта қонды. Сондай-ақ осы күні сағат 08:50-ге жоспарланған Алматы – Дубай бағытындағы KC897 рейсі де тоқтатылды. Әуе компаниясы тоқтатылған рейстердің жолаушыларына билет құны толық көлемде қайтарылатынын мәлімдеді. Ол үшін билетті сатып алған жерге жүгіну қажет. Air Astana рейстер кестесіне қатысты барлық кейінгі өзгерістер туралы қосымша ақпарат берілетінін хабарлады.