Астанада «Жас Ұлан» бірыңғай балалар мен жасөспірімдер ұйымы» республикалық қоғамдық бірлестігінің ұйымдастыруымен Eco Future Lab экологиялық хакатоны өтті. Іс-шара шағын грант аясында ұйымдастырылып, оған елордадағы мектептер мен колледждердің 14–17 жас аралығындағы оқушылары мен студенттері қатысты.

Хакатонның негізгі мақсаты – «Таза Қазақстан» жалпыұлттық жобасы аясындағы экологиялық бастамаларды қолдау, жастардың табиғатқа жанашыр көзқарасын қалыптастыру, экологиялық мәдениетін арттыру және қоршаған ортаны қорғауға белсенді тарту.

Екі күнге созылған бағдарлама барысында қатысушылар қалдықтарды қайта өңдеу, қаланы көгалдандыру, экологиялық сауаттылықты дамыту, қоршаған ортаны цифрлық технологиялар арқылы бақылау және жаңартылатын энергия көздерін пайдалану бағыттарында білім алды.

Сонымен қатар тәжірибелі мамандардың жетекшілігімен командалар экологиялық жобалар әзірлеп, оларды қорытынды кезеңде сарапшылар алқасының алдында қорғады. Ұйымдастырушылардың айтуынша, мұндай бастамалар жастардың шығармашылық әлеуетін дамытуға, экологиялық мәселелерді шешуге арналған тың идеяларды қолдауға және қоғамдағы экологиялық жауапкершілікті арттыруға ықпал етеді.